أصدرت المبادرة المصرية للحقوق الشخصية مجموعة من الارشادات القانونية للتيسير على الأهالي في التعامل مع حالات التوقيف التي تعرض/ قد يتعرض لها ذوويهم في الظرف الحالي (حظر التجوال-فض الاعتصامات-...)

تتضمن الارشادات الخطوات التي يجب اتخاذها لمعرفة مكان الاحتجاز وتوكيل محام وحضور الجلسات وزيارة المحتجزين.

وفيما يلي الارشادات: 

لو تعرف حد اتقبض عليه، تعمل أيه؟ 

اولا: فى حالة انه اتقبض عليه فى خرق حظر التجول    :

- التوجه برفقة احد المحامين (ضرورة قصوى) للقسم التابع له مكان القبض عليه  حتى يتمكن من الاطلاع على كشف الاسامى دون مضايقات وحضور التحقيق معه امام النيابة الذى يتم داخل القسم نظرا للظروف الامنية. 
 

- فى حالة عدم وجوده التوجه لاقرب قسم بعد سؤال معاون الضبط عن المكان الذى تم القبض عليه فيه وهل يدخل فى النطاق الجغرافى لقسم اخر ام لا.

ملحوظة: عقوبة خرق حظر التجوال بموجب المادة الرابعة من القرار رقم 532 لسنة 2013  هي السجن ثلاث سنوات كحد أدنى.

ثانيا: فى حالة القبض عليه فى احداث فض الاعتصامين (رابعة والنهضة):

منعا للبحث غير المجدى فى الاقسام والسجون اذهب برفقة احد المحامين (ضرورة قصوى) الىمقر احدى النيابتين:-  
 

- فى حالة القبض من رابعة  نيابة شرق القاهرة الكلية  والسؤال عن رقم القضية 15899 لسنة 2013 جنح اول مدينة نصر ومقابلة سكرتير النيابة  والاطلاع على كشف الاسماء  لمعرفة مكان احتجازه (لازم يكون معاك محامى - لعدم تعرض اى شخص ليك). 
 

- فى حالة القبض من اعتصام النهضة  التوجه لنيابة جنوب الجيزة الكلية والسؤال عن رقم القضية 12681 لسنة 2013 جنح الجيزة. والاطلاع على الكشف من سكرتير النيابة  لمعرفة مكان احتجازه ومواعيد التجديد.

- فى حالة احداث جامع الفتح برمسيس  مبدئيا الاقسام والسجون اللى الناس اتحجزوا فيها هي كالاتى (القاهرة الجديدة اول - القاهرة الجديدة تانى - الشروق - مدينة نصر اول - مدينة نصر تانى - الوايلى - الظاهر - الدرب الاحمر - قصر النيل -السيدة زينب - سجن ابوزعبل - سجن طرة). لو مش فى كل اللى فات يبقى في أمن الدولة (النيابة فى التجمع الخامس فى مجمع المحاكم  مبنى منفرد ممكن تسال اذا كان موجود واتحقق معاه).

ويفضل البداية بالسؤال عن رقم القضية 8615 لسنة 2013 نيابة الأزبكيه ويكون معاك محامى تتابع مع السكرتير الكشوف والتجديدات.

- فى حالة العثور عليه مراعاة  معرفة مواعيد التجديد وحضور محامى معه  للاهمية. 
 

- فى حالة عدم العثور عليه راجع كشوف المشرحة  والمستشفيات الاتية (القصر العينى القديم، القصر العينى الفرنساوى، ام المصريين، التامين الصحى بمدينة نصر، سيد جلال).
 

-  فى حاله عدم العثور عليه ايضا، يمكنك التوجه لمصلحة السجون للكشف عن اسمه، كما يمكنك تحرير بلاغ أما بإثبات واقعة الإختفاء، او إتهام الأمن بالإعتقال القسري.

أيه هى اجراءات الزيارة للمحبوس احتياطيا؟

- يتم تقديم طلب الزيارة الى المحامى العام التى تتبعه النيابة المختصة بالتحقيق، ويسمح بالزيارة خلال اسبوع من تاريخ الموافقة على الزيارة على ان يتضمن الطلب المعلومات الاتية ( اسم المتهم - رقم القضية المحبوس علي ذمتها - صفة مقدم الطلب - اسم السجن المحبوس فيه المتهم ).

  ملحوظة: يرفق بالطلب صورة البطاقة الشخصية لطالب الزيارة.

- تقدر تعرف هو محبوس فى سجن ايه من خلال:

1.      الحرس اللى بيكون مع المتهم فى النيابة.

2.      تقديم طلب لمصلحة السجون (بجوار محكمة الجلاء ) بشأن معرفة مكان حبسه والطلب يقدم من محاميه او احد اقاربه من الدرجة الاولى.

تقرير الطب الشرعى فى حالة الوفاة والفرق بينه وبين تصريح الدفن

- تقرير الطب الشرعى ده التقرير اللى بتستلمه من المشرحة مع الجثة وبيبقى مكتوب فيه سبب الوفاة  وسطر واحد امامها طلق نارى ( بالراس - بالبطن -الخ)  او حسب سبب الوفاة.  وده التقرير المبدئى بتصوره 4 نسخ تحتفظ بواحدة منهم وواحد بتطلع بيها تصريح الدفن وواحدة بترجع بعد فترة تطلب من النيابة بيها التقرير النهائى ومرحلة السماح بتشريح الجثة بتكون  بعد مالنيابة توافق على التشريح برقم محضر.

- لو حصل ان النيابة عرضت عليك تديك تصريح بدفن الجثة بدون التشريح تعمل ايه؟ هنا نفرق بينحالتين:-

1.      لو النيابة قررت تديك تصريح الدفن مع تقرير من مفتش الصحة لان المشرحة زحمة نتيجة تضاعف الاعداد  هنا بيبقى الاختيار ليك وتقرير المفتش من المعاينة الظاهرية بيكون دليل بس تبقى عارف انك لو طلبت استخراج الجثة وتشريحها هيكون على حسابك وحسب حالة الجثة وقتها.

2.      ان النيابة ترفض اصلا تديك سبب الوفاة وتكتب قدامه (/)، ده متقبلوش نهائى لانه بيهدر كل حق ليك وللمتوفى  وساعتها لازم تروح المشرحة وتصمم على ده.

قوائم وأرقام

كشف بحالات الوفاة

كشف بأسماء المفقودين

كشوف اسماء المصابين والوفيات فى مستشفيات (ام المصريين - القصر العينى القديم - القصر العينى الفرنساوى) 

لتسجيل مفقودين/ مصابين

لمتابعة التحديثات الدورية لكشوف أسماء المعتقلين

للابلاغ عن معتقلين فى القاهرة

01092530937